三水仔的新屋 + 新衫

近日天氣開始凍, 所以想買個新的狗狗床/屋比三水仔. 因為三水仔喜歡"有瓦遮頭", 所以想買個有頂的屋屋比佢, 終於o係淘寶比我見到隻幾o岩心水, 有屋頂, 但門口又夠寬夠大, 訓o係入面應該都幾舒服. 初初睇相都驚 size 會太細, 不過收到貨後都幾滿意, 三水仔入左去都仲有空間比佢, 不過可能依幾日都唔太凍, 佢都好少入去. 不過如果你扮搶佢間屋屋, 塞個頭入去, 佢就一定同你搶過, 自己走入去霸住, 好搞笑.


成日都一副傻瓜樣:

個啡色玩具係送的, 三水仔好鍾意咬, 不過都係同其他玩具一樣, "新屎坑一日香", 玩一陣就厭了.

既然買左個屋屋, 買多件衫衫啦, 還掂都要比運費架啦, 依件衫衫唔錯, 幾十蚊咋, 又舒服, 入面仲有件 T 架, 不過唔洗著咁多啦, 著得太多佢會唔舒服架嘛.

前面:

側面:

後面:

上面:

三水仔又有新野喇....

繼之前帶三水仔去做左公公後, 我地兩老又玩野了...就係..... 帶左三水仔去.... 鏟毛喇

D 人成日話狗仔要鏟兩三次毛, D 毛之後先會生得靚的. 本來我好反對架, 因為唔敢想像三水仔冇晒毛毛個樣會變成點, 後來O係寵物店見過大耳之後, 覺得冇晒毛毛都唔係好醜樣姐, 不過我以為大耳的毛已開始生長番, 因我成日以為鏟毛即係將所有毛剃晒, 會見到皮 (乜唔係架咩???), 點知三水仔剃完之後同大耳都差不多, 都幾靚仔丫...HEEHEE.... 放心晒!!

睇下佢 D 靚相:

三水仔: 唔制呀, 咁醜樣.... 冇眼睇喇我!!

老媽: 唔係丫, 都幾靚仔丫...
三水仔: 哼, 唔信.... 唔睬你呀~~~

不過講真, 佢鏟左毛毛後個樣, 真係完全唔同之前毛臣臣個樣, 好似變左另外一隻狗狗咁, 我仲覺得佢有D 似隻鹿仔, 尤其佢跑起黎既樣, 好似隻鹿仔O係到跑跳 仲有, 少D 毛毛都幾好丫, 清潔又方便, 同埋又可以睇清楚佢個得意樣.

三水仔, 冇論你係咩樣, 老媽都咁愛你架...MIU MIU, I LOVE U

第 11 日

今日係三水仔做手術後第 11 日, 真係辛苦晒你喇三水仔, 睇見佢咁辛苦但又唔可以幫佢除左個喇叭, 好慘呢!
不過三水仔都算乖, 都冇點扭計, 算你啦, 等你拆左線同喇叭, 就帶你去街街啦 

睇下佢, d 毛毛都生長晒, 就黎睇唔到佢對眼了, 今晚真係要同佢剪剪毛先.

三水仔今日做左"公公" 喇...

終於終於....三水仔今日去左做"公公手術"了. 一早9點幾已經送左佢去診所, 要等到佢下午做完手術, 麻醉藥過後先可以接佢回家, 真係擔心左我成日了. 離開診所時, 佢望住我地, 唔知會唔會以為我地唔要佢呢?!

等待其間, 我地入左去屯門, join 埋兩個朋友仔, 帶佢地隻 8 哥豬少去寵物店沖涼, 順便睇埋貴婦狗狗, 店主自己養左好幾隻狗狗, 我地同佢地玩左好耐, 真係好想買多隻貴婦陪陪三水仔. 貴婦真的好可愛架, 佢有能力令本來怕狗的人都鍾意, 我係其中一個例子, 另外 m 小姐又係啦, 佢真係好搞笑, 明明好驚狗, 竟然突然睇完小吉三姊弟之後想養貴婦狗狗.

講番我地三水仔啦, 下午三點幾, 診所打電話來, 話手術完成, 六點鐘就可以去接三水仔, 但姑娘話剃毛毛時, 由於 d 皮太薄, 剃損左佢, 聽完後心都痛埋, 都唔知傷成點, 痛唔痛, 三水仔一定好驚好擔心, 見唔到我地, 唔知會唔會喊喊, 你知三水仔係超級無膽的. 我又好擔心佢回來後的情緒況問題, 始終剛做左公公, 且又掉底左佢成日, 仲要戴住佢最討厭的"喇叭", 只希望佢會好倦, 好快會訓覺覺.

點知, 去到接佢, 一見我地就發顛, 抱住佢都發顛咁, 可能佢真係好驚. 安撫左佢一陣, 終於定下來, 不過好似唔係好睬我地, 係咪嬲左我地呢??!!

回到家, 佢都好似好倦, 躺o係 sofa 到, 但點都唔肯訓, 可能驚一訓左我地又走左去. 我地諗住早 d 熄燈訓覺, 等佢安心休息, 點知...... 我地一訓佢就 衣衣哦哦 咁叫, 唔肯比我地訓, 結果我就訓下又起身陪陪佢, 一直都早上 8 點鐘就起床了, 累!! 仲有, 都唔明點解佢剛做完手術都唔倦既, 唔肯訓不特只, 仲要成日跳上跳落 sofa, 激屎!!

今日就會帶三水仔去婆婆家, 住兩星期, 待傷口拆線後先回家喇, 因唔放心佢一個"狗" 在家, 唔知佢會點對個傷口架嘛.

希望佢快 d 好番啦, 傷口唔好有事呀!!

曳 miu

激屎我喇, 今日透過 msn 用視像偷窺 miu miu, 竟然比我發現佢 d 曳野, 仲要趁我出左去食 lunch 的時間犯案, 太過份了.

點解我會咁嬲.....看看下面的相就知發生咩事了....

都唔知佢已經食左幾多尿片碎落肚了..

Miu 爸回家後, 清理完案發現場後, 佢扮冇事發生過的衰樣:

你話激唔激屎我地丫...

DODO 出事了....

好黑仔呀, 新年流流, 受傷了....

尋晚在土屋好地地O係到煮飯, 最衰煲糖醋排骨放得太多水, 等極都未收乾水, 等待的時候無無聊聊, 又見 MIU MIU 好似好悶咁, 所以同佢玩下追逐遊戲, 點知唔知自己做乜鬼, 想跳過欄住走廊的圍欄, 等 MIU MIU 追我唔到, 點知我忽略了我的身型已經唔係當年苗條的我, 結果當然係...跳唔過啦, 成個人跌底了, 可能係比我個大冬瓜身軀壓到隻右腳, 我只感覺到痛..痛...同痛, 痛到我忍唔住大哭及不斷的叫痛, 嚇到肥B即刻過來救起我. 等左一陣隻腳依然好痛, 仲慢慢開始腫起來, 我估可能係傷左"印"帶, 但肥B擔心可能會斷骨, 叫我去睇急症, 但我又驚急症要等好耐, 我唔想肥B為左我搞到成晚冇得訓, 有想過去私家睇急症, 但好似只有沙田的仁安有急症睇??? 太遠了...結果我提議抖下先, 睇下明天的情況怎樣, 仲煲左隻雞蛋碌下, 不過好似冇咩作用. 其實我都擔心, 第二日肥B要番工, 得我一個點去睇醫生呢? 媽媽同姐姐又去左旅行, 冇人陪到我去..... 結果訓到二點幾, 醒左, 隻腳仲係好痛, 結果肥B 都係話去睇急症啦...結果肥B 就背住我依隻肥冬瓜, 行落 5 層樓.... 打的去左衣黎沙白睇急症. 照左 X 光, 證實腳掌的骨烈左, 唔怪得咁痛啦, 不過好彩唔洗打石羔, 醫生話因有附近的組織包住. 今日要去整支 STICK, 唔係真係行都行唔到! 肥B話下午請假同我去, 又累你已經少之又少的年假冇左半日 醫生仲寫左十日假比我休息, 唉, 雖然我係好唔想番工O者, 都唔係咁丫, 下星期又新年了, 冇得出街啦......唉

好彩 5 點已經搞掂晒, 又要麻煩肥B 背番隻大冬瓜上 5 層樓....

 

SORRY 囉, 下次唔敢, 但請你都唔好再鬧 MIU MIU, 真係唔關佢事的!

 

P.S1: 今日有個朋友話佢要入醫院留醫, 希望佢冇事啦!!

P.S2: 由於有兩個人都有事, 所以今晚幫西瓜慶生的活動要取消, SORRY 呀西瓜, 等我地好番再食過! 希望你 8/2 有個快樂的生日啦!

MIU MIU 給我的說話

MIU MIU 說:

一，把我帶回家前，請記得我的壽命約有十至十五年，若你離開我，會是我最大的痛苦。

二，對我有耐心，你要給我一些時間來了解我。

三，信任我──那對我十分重要。

四，請別對我生氣太久，也別把我關起來當做懲罰。你明白嗎？你有你的工作、娛樂、朋友，而你是我的唯一。

五，請時常對我說話，縱使我不懂你說話的內容，但我會感覺到，你的聲音在陪伴我。

六，你如何對待我，我將永記在心。

七，打我時請記得，我擁有可以咬碎你手骨的尖銳牙齒，我只是選擇不這樣做。

八，當你想責罵我不合作、固執或懶惰，請你想想，是否有什麼困擾著我。或許我沒獲得想要的食物、很久沒在溫暖的陽光下奔跑，或者我的心臟已經太弱或太老。

九，在我年老時請好好照顧我，因為你也會變老。

十，當我要捱過生老病死最辛苦的歷程時，請千萬不要說：「我不忍心看，我不想在場。」只要有你和我在一起，所有的事都會變得容易接受。請你永遠不要忘記，我愛你。

 

土屋新成員 - miu miu

好開心呀, 新屋多左個新成員, 佢就係 ---MIU MIU 喇

 

 

MIU MIU 三個月大, 係隻男仔 TOY POODLE, 顏色係火紅. 今日本來只係去睇睇, 未打算買的, 點知...真係一抱上手就..... 唔捨得唔要佢. MIU MIU 佢好乖, 好文靜, 係我鍾意佢既原因. 買左佢之後, 我一路抱住佢回家, 佢都好乖, 真抵錫

回到家之後, 等緊肥 B 清潔佢間新居, 我都一直抱住佢...待家清理好之後, 放左佢入去, 可能不太習慣, 佢 ehh ehh 的叫...我地都唔理佢 (係唔可以理的, 因佢習慣左, 會以為吠下叫下就有人理)... 後來終於出現"吠" 聲, 不過都只係吠左幾下, 就又好安靜的視察下新屋環境, 玩下玩具, 然後訓覺覺, 真乖  真的好怕成日都吠的狗狗, 好彩 miu miu 唔係咁, 希望佢以後都唔係. 但我直覺覺得 miu miu 係好乖好聽話的

miu miu ...i love u!

p.s: miu miu 今晚可能太倦, 又打左針, 所以好乖咁訓左, 希望聽日訓醒唔好曳曳啦!!

又 p.s: 肥 b 話 miu miu 成晚在新環境都冇吠, 訓醒左都係自己玩玩具, 真乖乖!! i miss u le miu miu