雜錦三水仔

激心衰仔

由細到大, 三水仔基本上都幾乖幾易教, 起碼佢唔會成日吠 (佢平時真係可以成日唔出一粒聲的). 又好快識便便同尿尿, 唔會四周圍痾 (當然都會偶有失手啦 heehee), 又唔會亂咬野 (唔係佢自己的野佢好少咬的), 不過有樣野衰, 就係太硬頸囉.  衰仔成日唔肯食狗糧, 轉過幾個牌子都係咁. 試個唔食就收起, 餓下佢佢就會食, 但....可能兩三日先食少少囉 本想佢唔食咪唔食囉, 但近排佢成日嘔, 嘔 d 黃膽水, 醫生話可能係個胃冇野比佢消化, 佢試過一星期嘔 5 次, 嘔到個胃發炎. OK, 好啦, 唯有混 D 好味野落 D 狗糧到比你食啦....有雞肉, 三文魚肉, 南瓜, 雞蛋, 蕃薯 ....等等. 但個衰仔又成日只揀 D 好味野食, 唔食 D 狗糧, or 食左入口都吐番出來, 仲有呀, 唔可以一次過 mix 晒比佢食喎, 佢要一路食, 你一路加比佢, 唔係佢食少少就停, 個衰野仲要衰到, 食淨一粒糧黎等你再加野食比佢, 後黎衰到糧一 d 都唔食, OK, 唯有淨碎 D 糧連埋 D 好味野等你食埋. 但剛轉左隻糧, 第一次食佢又肯食喎, 好似好好味咁, 點知第二次已經唔食了.....搞到我真係有 D 嬲, 衰仔, 你知唔知媽媽餵你食野好辛苦架?? 仲有呀, D 糧好貴架, 媽媽都肯買比你食, 你仲要咁硬頸, 你話比媽媽知你想點啦

尋晚回家, 婆婆又投訴衰仔唔肯食野, 已經比我鬧左一輪, 夜 D 我再餵佢, 佢又淨係食雞肉, 唔食糧, 嬲到我倒野佢, 唔比佢食.



比人鬧佢通常會行埋一邊, 匿埋一角, 唔敢望你, 但又會偷偷裝下你:

你睇佢係唔係在扮可憐? 心軟 D 都會比佢呃到架

之後我收起佢支波板糖, 唔准佢食, 點知佢係到嗯嗯嗯, 仲有自動做"請請"動作, 好可惜, 媽媽實在太嬲了, 對佢扮可憐的動作無動於衷呀!


三水仔: 好想要番枝波板"雞"呀, 睇下媽媽嬲完未先....

....屎啦, 好似仲嬲緊呀, 驚驚天.......點算好呢?!

唯有出我的殺手皂: 扮可憐~~~~~~~~~~

仲有扮可愛~~~~~ 平時都係"請請" 就有野食架!

~~~~~~~~~~~~~~~~可惜可惜, 媽媽都係唔彩我, 行動失敗

媽媽呢?

由細到大, 我都覺得三水仔痴爸爸多點, 因為頭幾個月都係跟爸爸住多. 但有時落街, 我行左入舖頭買野, 三水仔就會好不安, 係咁嗯嗯叫, 有時甚至吠添. 究竟佢係太掛住我丫, 定係擔心我一個人走開有危險? ...真係要問佢先知喇

以下係我去左買野, 佢在車上的情形:


三水仔: 媽媽呢? 媽媽呢?

三水仔: 媽媽, 你去邊呀??? 快 d 回來啦, 三水仔好掛你呀 ... (媽媽: 係唔係真先 )

三水仔: 係o個邊?

.......定係依邊呢?

三水仔: 仲未見媽媽既?????

三水仔: 爸爸呀, 你坐o係到做乜呀? 快 d 去找媽媽回來啦, 唔該!!!

三水仔: 真係擔心屎我喇!

爸爸話三水仔望緊既時候, 有架車停左o係佢前面, 阻住左佢找媽媽, 佢好大聲吠人地呀, 真係衰仔,.....不過又幾心甜既

西貢"游"

星期六, 見個天冇點下雨, 就走左入西貢, 入到去都成 3 點了, 好肚餓, 坐底食 d 野先:


三水仔冇份

之後同三水仔散下步啦, 發現有個比狗狗玩的新場開左, 仲有得比狗狗游水架! (掛住玩冇影相)

得一張, 未游水前的開心樣:

三水仔: 睇下我條利幾長.....

我地去到時, 個游水池都冇咩狗狗. 第一次登記要比 $20, 游水 $40 (但唔記得可游幾多分鐘). 個池仲有工作人員o係到照顧 d 狗狗, 咁就放心好多啦.

三水仔第一次游水咋, 我都有少少擔心, 一黎佢比時少運動, 二黎佢又超細膽, 一定會怕水. 不過好彩有工作人員睇住, 都 ok, 仲估唔到游得幾好, 因第一次游, 唔敢比佢游太耐, 結果 5分鐘就上水了. 不過夠了, 佢一定好倦, 仲游到扯蝦咁. 而且當時天都黑晒, 好似就下大雨, 所以就走了.

o個到仲有得沖身同吹身, 不過係咁易吹下咋, 未乾晒就走人, 都驚佢會冷病.


臨走時, 爸爸下車行開左, 三水仔係咁望住, 拿, 唔係淨係媽媽行開先會咁架

回到家, 倦到呢.....

今日仲請左佢食支"波板糖", 其實係 chicken, 好似仲有 rice 的成份, 硬硬地, 比佢咬的:

三水仔: 支波板糖好可愛呀, 媽媽你幾時影完相, 我想快 d 試下呀:

經過三水仔一輪測試, 發覺依支波板(雞)應該麻麻, 連平日最愛吃雞肉的三水仔都唔係好吼, 咬幾下就唔咬, 但我一話比細佬食, 個衰仔就即飛去擔住, 驚死真係比細佬食左, 好搞笑...

遲 d 再熱 d , 要帶多 d 三水仔去游水至得, 如果可以一齊游就好喇!

大美篤遊

今日本來想辦完事之後入西貢, 不過又好似太晏, 又太倦, 所以改去大美篤.

大肚餓了, 要食 d 野先行得:

知道有得行街街, 幾開心:

食飽飽再去水霸行一陣.

只係行左一陣就回家了

fish eye 三水仔

三水仔剥牙仔

可憐的三水仔, 可能係遺傳關係, 到了歲半大 d 乳齒仲未甩掉, 結果出現了兩排牙齒, 好易藏污 jo 野, 如有爛牙會影響到心臟等等的, 所以唯有忍心帶佢去醫生到剝晒佢, 又要麻醉,  一次剝左 9 隻呀, 真係心真痛, 埋睇睇下面(有 d 核突架):

三水仔之後仲嬲左我地兩日唔睬我地呀, 好彩佢之後都冇咩唔舒服.

今次去睇醫生仲順便睇埋佢個腸胃, 因佢成日嘔呀, 臨睇醫生o個個星期仲一星期嘔成 5 次, 嘔埋 d 黃色泡泡, 問過寵物店, 佢話有可能因成日唔食野, 胃入面冇野比佢消化, 所以嘔, 去到診所時, 話比姑娘聽, 佢都係咁講, 諗落真係有可能, 因佢真係成日唔肯食野, 又次次都係早上訓醒嘔的, 後尾醫生幫佢照左 x 光, 話都冇咩大問題, 但胃有 d 厚, 可能係少少發炎, 開左 d 藥比佢食, 同叫我地比番多少少野佢食, 唉, 唔係我地唔想比呀, 要大少肯食先得架, 我地而家唯有撈 d 雞肉, 三文魚肉等比佢食, 個衰仔仲要揀晒 d 肉肉出來食, 唯有要將 d 糧整碎佢, 等佢食埋, 仲要一路食一路加肉肉, 唔可以一次過加晒, 你話佢幾麻煩.