第二堂美容班

終於上左第二堂喇, 未上之前一直好擔心, 因為我第一堂完左都仲未掌握到剪腳底毛同腳甲. 上完第二堂之後.....好失落, 好有挫敗感...因為我...仲係未剪到腳甲. 我控制唔到隻狗狗呀. 反而比佢控制我. 佢成日郁來郁去, miss 叫我要箍實佢, 唔好比佢掙脫到, 如果我好易放開佢, 佢就知我好蝦. 但我真係做唔到呀, 我好驚整親佢, 佢郁一郁我就放開. 又唔敢下刀, 好驚剪到血管 我用左兩個鐘時間, 都指唔到一隻腳指, 唉, 好失敗囉. 結果最後都由 miss 出馬. 佢三兩下工夫就搞掂. 無論狗狗點叫點掙扎, miss 都冇理. 好勁!! 下堂點好呢? 唔可以次次都叫 miss 幫架嘛

依隻就係我第二堂的 model 約瑟嗲利, 同行既有兩隻架, miss 叫我揀一隻, 我揀左佢, 因另外一隻似係活躍 d, 又成日叫的, 我驚我 handle 唔到, 所以唔揀佢, sorry 呀 . 差不多有一半時間佢都在我台底下, 因冇人理佢, 佢不停在叫, 仲要發出好似狼叫的聲音, 好搞笑!


未出涼前:

沖完涼之後:

依隻約瑟唔知叫咩名呀, 基本上幾乖既, 只係沖涼時, 一洗到頭就閃, 唔比我洗, 同埋吹頭會驚之外, 基本上都 ok 既. 如剪腳甲唔蝦我就更好啦 , 唉, 我今次又用左 5 粒鐘時間喇, 仲要如果唔係 miss 幫我, 我都唔知幾時放到學. 有 d 同學仔好快搞掂, 仲一堂沖左兩隻狗狗呀, 雖然第二隻唔洗剪腳甲.

上一堂見到詩雅都黎上堂, 無錯, 係拍戲o個個女仔. 上堂見到佢, 我都覺得佢幾靚同好似幾 nice. 佢上次帶左自己隻黑色 poodle 來沖涼. 佢隻 poodle 好可愛架, 好想同佢影張相, 但又唔好意思. 今堂佢都有來, 但就冇帶狗狗, 我地仲o係沖涼房傾左一陣計. 原來佢隻 poodle 係收養返來的, 回來了個幾兩個月咋, 都未幫佢剪過毛, 我覺得好犀利,  個型可以 keep 咁耐都仲咁靚, 如果係我隻三水仔, 唔洗兩個星期就變左個流浪漢咁喇. 今堂佢已經開始學剪毛, 幫隻松鼠狗剪, 隻狗狗好乖好定呀, 見佢剪得都唔錯. 唔知到我剪時會點呢?? 佢仲話學黎係為左第日開寵物店, 好乖的一個女孩子, 希望佢會好快願望成真啦.

其實我報既係基礎班, 報之前我已講明學黎只係為了我幫自己的狗狗沖涼剪毛, 所以希望佢地會比 poodle 我練習, 佢地都話會儘量安排. 沖涼我就冇所謂, 但剪毛時希望佢真係會比 poodle 我練啦.